Azərbaycanda minlərlə vətəndaş çıxarışı olmayan evlərdə yaşayır. Bəzi hallarda bələdiyyələr həmin evlərə görə sakinlərdən əmlak vergisi tələb edirlər.
Əmlak eksperti Elnur Azadov bildirib ki, əmlak vergisinin tətbiqi üçün əsas şərtlərdən biri mülkiyyət hüququnun rəsmi qaydada tanınmasıdır. Onun sözlərinə görə, çıxarışı olmayan, qanunsuz tikili hesab edilən evlərə görə əmlak vergisinin tələb olunması qanuni əsaslara söykənmir.
Ekspert qeyd edib ki, evin çıxarışı olmasa da, yerləşdiyi torpaq sahəsi vətəndaşın mülkiyyətində ola bilər. Bu halda torpaq vergisi hesablana bilər, lakin bu, tikiliyə görə də əmlak vergisi ödənilməli olduğu anlamına gəlmir.
E. Azadov vurğulayıb ki, bələdiyyənin vergi bildirişi göndərməsi vətəndaşın həmin vergini ödəmək öhdəliyinin yarandığı demək deyil. Vətəndaş belə tələblə qarşılaşdıqda onun hüquqi əsasını sorğulamaq və müvafiq qaydada etiraz etmək hüququna malikdir.
Mənbə: demokrat.az
