Bakıda 67 yaşlı kişi qeyri-rəsmi nikahda yaşadığı qadını döyüb.
Demokrat.az xəbər verir ki, hadisə paytaxtın Xətai rayonunda baş verib. Bakı şəhər sakini, 1959-cu il təvəllüdlü Tahir kirayədə yaşadığı mənzildə qeyri-rəsmi nikah münasibətində olduğu Elmira (adlar şərtidir – red.) ilə mübahisə edib.
Aralarında yaranan münaqişə zamanı o, Elmiranın baş nahiyəsinə əl zərbələri endirərək ona müxtəlif dərəcəli xəsarətlər yetirib.
Faktla bağlı Tahir barəsində Cinayət Məcəlləsinin 128-ci (qəsdən sağlamlığa zərər vurma) maddəsi ilə ittiham irəli sürülüb.
İş üzrə ifadə verən Tahir ona elan olunmuş ittiham üzrə özünü təqsirli bildiyini deyib. O, əməlindən peşman olduğunu və zərərçəkmişlə barışdığını bildirib. Zərərçəkmiş qadın da ifadəsində Tahiri bağışladığını və ona qarşı şikayətini geri götürdüyünü söyləyib.
Xətai Rayon Məhkəməsinin hökmü ilə Tahir barəsində olan cinayət işi üzrə icraata xitam verilib və o, cinayət məsuliyyətindən azad olunub.
