Abşeron rayonu, Xırdalan şəhəri, “AAAF Park” yaşayış kompleksi yenə narazılıqlarla gündəmə gəlib.
Bakues.az xəbər verir ki, ötən ilin sentyabrında sözügedən ərazidə dövlət atributlarının təsvir olunduğu kompleksin söküntüsü ilə bağlı video yayılmışdı.
Sökülən kompleksin yerində nə inşa olunacağı ilə bağlı suallar ünvanlandıqdan sonra şirkət tərəfindən sözügedən guşənin yenilənəcəyi barədə xəbər paylaşılmışdı.
Son məlumata görə, həmin ərazidə söküntü işləri daha da genişlənirilib və mənzərə onu deməyə əsas verir ki, şirkət tərəfindən yeni tikinti layihəsi üçün dövlət atributlarının olduğu yer seçilib. Vətəndaşlar da mövcud durumdan şikayətçidirlər. Sakinlərin sözlərinə görə, aparılan tikinti işləri binalara yaxındır və bu, onların gündəlik yaşayışına mənfi təsir edir.
Maraqlıdır ki, yaşayış kompleksinin layihəsində həmin ərazidə başqa tikilinin yer alması nəzərdə tutulmayıb. Dövlət Şəhərsalma və Arxitektura Komitəsinin də aparılan tikinti işlərindən xəbərsiz olduğu və Fövqəladə Hallar Nazirliyinin müvafiq qurumları ilə razılaşdırılmadığı vurğulanır.
Həmin ərazinin sakinlərin parklanma yeri olduğu da qeyd olunmaqdadır. Kompleksdə yaşayan vətəndaşlar artıq 5 aydır, mövcud vəziyyət ucbatından avtomobillərini park etməklə bağlı çətinliklər yaşayırlar.
Bununla yanaşı, AAAF binalarında liftlərin olmadığını, lift şaxtalarının təhlükəli vəziyyətdə – açıq olduğunu qeyd edən sakinlər buna görə övladlarının təkbaşına çölə çıxmasına icazə vermədiklərini vurğulayıblar. Liftlərin işləməməsi və şaxtaların təhlükəli vəziyyətdə olması ilə bağlı şirkətə şikayət ünvanlayan sakinlər heç bir müraciətə münasibət bildirilmədiyini də əlavə ediblər.
Minlərlə sakinin “AAAF Park” binalarında yaşadıqları “N” sayda problem azmış kimi park yerlərinin işğal olması da əhalinin səbrini daşırmaqdadır.
