Bu gün müğənni Xeyransa Məmmədovanın anım günüdür. Bu haqda 2 iyun tarixində Bakuplus.az məlumat verir.
Xeyransa Məmmədova 1966-cı il 26 noyabr tarixində kasıb bir ailənin 9-cu övladı olaraq dünyaya gəlib. Bakıdakı 232 nömrəli orta məktəbdə oxuyan Xeyransa elə kiçik yaşlarından səhnəyə çıxaraq, məşhurluq qazanmışdı. Daha sonra Bülbül adına Orta İxtisas Musiqi Məktəbində xanəndəlik sinfində təhsil alıb.
Uşaq vaxtı həyətlərində oynayanda qəfil üstünə it cumur. Xeyransa keçirdiyi qorxunun təsirindən şəkər xəstəliyinə tutulur.
1977-ci ildə “Vətən” instrumental ansamblına qoşulub, ardınca “Oxu tar” müsabiqəsinə qatılaraq uğur qazanıb və 14 yaşında böyük səhnəyə çıxıb.
Onun ifasında Səid Rüstəmovun “Oxu tar”, “Oxu gözəl”, Cahangir Cahangirovun “Necə əl çəkim”, “Ana Kür”, Emin Sabitoğlunun “Azərbaycan”, “Təklik”, “Ay bülbüllər” və “Sarı bülbül” mahnıları populyarlıq qazanıb. Moskva, Kiyev, Xarkov, İrəvan və Tiflis şəhərlərində də konsert proqramları ilə çıxış edib.
Hər zaman ana olmaq istəyən Xeyransa Məmmədova səhhətinə ziyan olsa da, övladını dünyaya gətirmək istəyir. Həkimlər ona qəti qadağa qoysa da, 5 övlad dünyaya gətirir, lakin heç biri sağ qalmır. 1995-ci il iyunun 2-də sonuncu doğuşdan sonra 29 yaşında vəfat edib və Bülbülə qəbiristanlığında torpağa tapşırılıb.
Son müsahibələrinin birində Xeyransa xanım belə demişdi: "Çox yox, kaş 50 il yaşayıb, planlarımı həyata keçirə bilsəydim...".
