Azərbaycanəsilli sahibkar, "Lukoil"un təsisçisi Vahid Ələkbərov Rusiya və dünyanın ən varlı insanları siyahısında öz mövqeyini xeyli möhkəmləndirib. Son məlumatlara görə, onun sərvəti 2024-cü ildə 2.59 milyard dollar artaraq 27.2 milyard dollara çatıb.
Oxu.Az bu barədə "Bloomberg Billionaires Index" (BBI) reytinqinə istinadən məlumat verir.
Hesabata əsasən, o, sərvəti 2024-cü ildə əhəmiyyətli dərəcədə artan rusiyalı milyarderlərin siyahısında üçüncü yerdədir.
Siyahıya "Nornickel"in təsisçisi Vladimir Potanin başçılıq edir, onun sərvəti 736 milyon dollar artaraq 31,8 milyard dollara çatıb. İkinci yerdə 29 milyard dollarla Vladimir Lisin durur.
Qeyd edək ki, dünyanın ən varlı 500 insanının sərvəti haqqında məlumatları özündə birləşdirən "Bloomberg Billionaires Index" 2012-ci ilin martından bəri dərc edilir. İndeks, xüsusilə şirkətlərin səhmlərinin dəyərinə əsasən hesablanır.
Qeyd edək ki, Vahid Ələkbərov 1 sentyabr 1950-ci ildə Bakının Bakıxanov qəsəbəsində anadan olub.
