Şair, yazıçı Murad Köhnəqala qaz istehlakına görə artıq borc yazılmasından şikayətçidir.
Bakuplus.az xəbər verir ki, o, sosial mediada etdiyi paylaşımda iki gün üçün 132 manat borc yazıldığını bildirib.
O deyib ki, yanvarın 1-də qaz üçün 50 manat ödəniş edib, 20 manat borcu qalıb: “Çekdə də göstərilib. Yanvarın 3-də 152 manatlıq borc yazılan çeki veriblər. Mənim yanvarın 1-i 20 manat borcum var idisə, belə çıxır ki, iki günə 132 manatlıq qaz yandırmışam? Əlavə bu pul niyə yazılır?"
Məsələ ilə bağlı “Azəriqaz” İstehsalat Birliyinin mətbuat xidmətinin rəhbəri Eldəniz Vəliyev saytımıza açıqlamasında bildirib ki, iki gün ərzində 132 manat borcun yazılması mümkünsüzdür: “Həmin borc yanvarın ilk günlərində olan yox, ötən ilin noyabr və dekabr ayları ərzində həmin istehlakçı tərəfindən sərf olunan qazın həcmindən yaranan debitor borcdur. Həmin şəxsə noyabr ayı üzrə sərf olunan qaz həcminə görə çek verilib, abonentin növbəti ildən limitini sərf etməməsi üçün ona dekabr ayında isə iki dəfə çek verilib”.
Eldəniz Vəliyev bildirib ki, ödəniləcək məbləğin ötən ilin sonunadək və ya növbəti ilin limitindən istifadə edərək ödənilməsi vətəndaşın özündən asılıdır.
