Azərbaycanda ilk dəfə keçiriləcək sumo üzrə dünya çempionatının tarixi və yeri bəlli olub.
Bu barədə idman.biz-ə Yapon Döyüş Növləri və Mədəniyyəti Assosiasiyasının prezidenti Atil Ağamirov məlumat verib.
Turnir gələn il oktyabrın 17-18-də Bakı İdman Sarayında təşkil olunacaq.
Qurum rəsmisi turnirin reqlamenti ilə bağlı da danışıb. Onun sözlərinə görə, yarışda 35 ölkənin iştirakı planlaşdırılır:
"Bu say daha da çox ola bilər. Çalışacağıq ki, Azərbaycandan hər çəki dərəcəsində idmançının iştirakını təmin edək. Həm yeniyetmələrdə, həm də böyüklərdə idmançılarımızın mübarizə aparmasını istəyirik. Qadınlar və kişilər arasında keçiriləcək çempionatda ən aktual çəki dərəcələri 85, 100, 115 və 115+ və mütləq çəki dərəcəsində. Eyni zamanda komanda yarışı da təşkil olunacaq. Biz çalışacağıq ki, çempionatda keçirilən hər bir çəki dərəcəsində öz idmançılarımız təmsil olunsunlar".
