Bakı şəhər İcra Hakimiyyəti quruyan şam ağacları barədə tədbir görüb. Bu haqda BakuPlus.az APA-ya istinadən bu gün, 8 iyun tarixində xəbər verir.
Artıq bir müddətdir paytaxtın bir sıra ərazilərində xeyli müddət əvvəl əkilmiş şam ağaclarının bir sıra növlərinin quruması baş verir. Bakıya xarici ölkələrdən alimlər, həmçinin BMT Ərzaq və Kənd Təsərrüfatı təşkilatının mütəxəssisləri dəvət edilib.
Əsasən yaşı 40-45 il olan şam ağaclarında müşahidə edilən xəstəliklərin aradan qaldırılması ilə bağlı işlərdə yerli alimlər də iştirak edir.
Təcrübə çərçivəsində Mərkəzi Nəbatat Bağında xəstəliyə yoluxan 9 ədəd Eldar şamının 3 müxtəlif üsulla peyvəndlənməsi aparılıb.
Qısa vaxt ərzində ağaclarda baş verən müsbət dəyişikliklər araşdırılacaq, hansı peyvəndin daha uğurlu olduğu müəyyən ediləndən sonra şam ağaclarında kütləvi peyvəndləmə aparılacaq.
Bu günə kimi Ekologiya və Təbii Sərvətlər Nazirliyinin mütəxəssislərinin rəyi əsasında Bakı şəhərində xəstəliyə yoluxan və müalicəsi mümkün olmayan 3000 ədəd şam ağacı kəsilərək utilizasiya edilib.
