“Formula 1” Azərbaycan Qran Prisi zamanı piyadalar üçün heç bir məhdudiyyət qoyulmayacaq. Bu haqda bu gün, 3 iyun tarixində Modern.az Bakı Şəhər Halqası (BŞH) Əməliyyat Şirkətinin mətbuat katibi Turab Teymurova istinadən məlumat verib.
Halqa ərazisində yerləşən yeraltı keçidlər yarış həftəsi ərzində şəhər sakinlərinin maneəsiz hərəkətini təmin etmək üçün gün boyu açıq olacaq.
Piyadalar, həmçinin halqanın ətrafında, Azərbaycan prospekti ilə İstiqlaliyyət küçəsinin, Xaqani və Rəşid Behbudov küçələrinin, Azadlıq prospekti ilə Xaqani küçəsinin kəsişməsində müvəqqəti yerüstü keçidlərdən də istifadə edə biləcəklər.
Rəşid Behbudov küçəsinin Neftçilər prospekti ilə kəsişməsində salınan yerüstü keçid isə daimi olaraq quraşdırılıb. Hazırda orada tamamlama işləri aparılır.
