Bakıda xəstə baxıcısı olaraq çalışdığı evdən oğurluq edən qadın barəsində məhkəmə qərar çıxarıb. Bu haqda BakuPlus.az Qafqazinfo-ya istinadən bu gün, 10 iyun tarixində xəbər verir.
Bakı Ağır Cinayətlər Məhkəməsində keçirilən prosesdə ev sahibinin evindən 178 min manatlıq oğurluq edən xəstə baxıcısı 5 il müddətinə azadlıqdan məhrum edilib. Cinayət Məcəlləsinin 70-ci maddəsi tətbiq edilməklə, 2 il müddətinə sınaq müddəti olmaqla cəzası şərti hesab edilib.
Nigar Qulamova (ad, soyad şərtidir) adlı qadın ötən ilin sentyabrında Bakının Nəsimi rayonu, Dilarə Əliyeva küçəsi 251 ünvanında, mənzillərin birində insult keçirmiş qadına aylıq 700 manat maaş müqabilində baxıcılıq edib.
Nigar işə başladıqdan bir ay sonra yataq otağının dolabında xeyli miqdarda pul vəsaitinin və qızıl-zinət əşyalarının olduğunu görüb. Dolabdan 9 min dollar və min manat dəyərində bir cüt sırğa-üzük dəstini götürüb.
O, eyni ayda yataq otağında növbəti dəfə təmizlik işi apararkən çamadanın içində gördüyü 100 min dolları və 5 min manat dəyərində qızıl-zinət əşyalarını götürüb.
Qadın ümumilikdə ev sahibinə 178 min manat məbləğində maddi ziyan vurub.
Məhkəmə zamanı o da məlum olub ki, xəstə baxıcısı oğurluq yolu ilə əldə etdiyi puldan 100 min manatını illik 10 faiz gəlir əldə etmək şərtilə 12 ay müddətinə banka yatırıb.
Məhkəmədə zərərçəkmiş şəxs ona dəymiş ziyanın ödənildiyi üçün Nigardan şikayətçi olmayıb.
Nigarın həyat yoldaşı bıçaqlanma hadisəsinə görə hazırda həbsdədir.
