Bakıda süd məhsulları istehsal edən müəssisənin rəhbəri inzibati məsuliyyətə cəlb edilib. Bu haqda BakuPlus.az Azərbaycan Respublikasının Qida Təhlükəsizliyi Agentliyinə istinadən bu gün, 8 avqust tarixində xəbər verir.
Sabunçu rayonu, Ramana qəsəbəsi, Südçülük sovxozu ərazisində fəaliyyət göstərən, fiziki şəxs Röyal Həsənova məxsus süd və süd məhsullarının istehsalı müəssisəsində planlı yoxlama aparılıb.
Bu zaman müəssisədə sanitar-gigiyenik qaydalara, texnoloji ardıcıllığa, mal qonşuluğu prinsipinə və temperatur rejminə riayət olunmadığı, süd məhsullarının ilkin istehsalı, istehsalı və qablaşdırılmasının eyni sahədə həyata keçirildiyi müəyyənləşdirilib.
Həmçinin istehsal olunan məhsulların etiketlənməsində uyğunsuzluqlar, işçi heyətin tibbi müayinədən keçmədiyi və digər nöqsanlar aşkar edilib. Məhsullardan nümunələr götürülərək müvafiq laboratoriyalara təqdim edilib.
Aşkar olunmuş pozuntularla bağlı müəssisə rəhbərliyi inzibati məsuliyyətə cəlb edilib. Müəssisədə istehsalın dayandırılmasına dair məhdudlaşdırıcı tədbirlərin tətbiqi barədə qərar qəbul edilib.
