Bakıda Ekologiya və Təbii Sərvətlər Nazirliyinin təşkilatçılığı ilə “İqlim dəyişmələri şəraitində Xəzər dənizinin səviyyə tərəddüdləri, proqnoz və uyğunlaşma tədbirləri” mövzusunda 5 iyul tarixində beynəlxalq konfrans keçiriləcək. Bu haqda məlumatı bu gün, 1 iyul tarixində nazirliyin mətbuat xidməti verib.
Milli Hidrometeorologiya Xidmətinin rəhbəri Umayra Tağıyeva bildirib ki, Xəzəryanı ölkələrin mütəxəssisləri, beynəlxalq təşkilatların nümayəndələri və xarici ekspertlərin iştirakı ilə keçiriləcək konfransda Xəzər dənizinin səviyyəsindəki dalğalanmaların səbəbləri, regional proqnozların hazırlanması məsələləri müzakirə olunacaq.
Tağıyeva qeyd edib ki, Xəzər dənizinin səviyyəsinin dəyişməsi ilə bağlı müxtəlif orta və uzunmüddətli proqnozlar mövcuddur. Bununla bağlı daha real ssenarinin seçilməsi məsələsinə baxılacaq, ona uyğun olaraq Xəzər dənizinin sahilyanı əraziləri üçün uyğunlaşma planı hazırlanacaq və regional yanaşmanın tətbiqi sahəsində birgə fəaliyyət istiqamətləri müəyyən ediləcək.
