Gün ərzində sərnişinlərin ən çox istifadə etdiyi ictimai nəqliyyat Bakı metrosudur. Təəssüf ki, metroda isə vəziyyət ürəkaçan deyil.
Belə ki, hər gün səhər saatlarında işə gedən sərnişinlər qatarlarda yaranan texniki-nasazlıq, yubanma səbəbindən mənzil başına gecikirlər.
Bu gün səhər saat 07:30 radələrində qatar metronun “Elmlər Akademiyası” stansiyasına daxil olaraq dayanıb. Lakin texniki nasazlıq səbəbindən hərəkət etməyib və təhlükəsizlik məqsədi ilə sərnişinlər qatardan boşaldılıb.
Maraqlıdır, hər gün minlərlə sərnişin daşıyan qatarlar xəttə buraxılmazdan öncə yoxlanılmırmı?
Məsələ ilə bağlı “Bakı Metropoliteni” QSC-nin Mətbuat Xidmətinin rəisi Bəxtiyar Məmmədov BakuPlus.az-ın sorğusuna cavab olaraq bildirib ki, sadalanan problemlər 5-10 il bundan əvvəlki dövrlə müqayisədə kifayət qədər azalıb:
“Artıq çox nadir hallarda belə problemlər olur. Əsasən sərnişinlərin sıx olduğu saatlarda nasazlıq ehtimalları yaranır. Ən kiçik nasazlıq ehtimalında belə sərnişinlərin qatarlardan boşaldılması önəmlidir. Bu nöqsan xronikada qeyd edilir və illik hesabatda əksini tapır. Bəzən aylarla metroda texniki nasazlıq baş vermir. Bu gün səhər saatlarında müşahidə edilən problem isə vaqonlardan birinin qapısı ilə əlaqəli olub. Qatarlar gün ərzində 8-20, əsasən də 11-20 saat xəttə istifadədə olur. Sərnişin sıxlığı yaşanan dövrdə vaqonların qapılarına sərnişinlər tərəfdən fiziki təzyiq halları ilə rastlaşırıq. Bu səbəbdən qapılarda müəyyən nasazlıq yaranması müşahidə edilir. Bu gün ən əsas problem qapılarda bağlı olur. Bundan öncə də metronun “Neftçilər” stansiyasında sərnişinlər tərəfindən vaqon qapısına təzyiq olunmuşdu. Maşinist baxış keçirib və qatarın depoya göndərilməsinə qərar verib. Sərnişinlər stansiyada boşaldılıb və qatar texniki baxışa göndərilib. Bütün qatarlar yeni tədris mövsümü başlayandan həm gecə, həm də gündüz saatlarında texniki müayinələrdən keçirilir. Əlavə müayinələr təyin edilir. Protokola uyğun olaraq kondisioner sistemləri, sərnişinin müdaxilə edə biləcəyi və edə bilməyəcəyi bütün qovşaqlar yoxlanılır. O cümlədən təhlükəsizliklə bağlı olan məsələlərə də nəzarət olunur”.
