Yay mövsümünün başlaması ilə Bakı Metropolitenində sanitar normaların tələblərinə əməl olunması ilə bağlı nəzarət mexanizmləri gücləndirilib. Bu barədə məlumatı “Bakı Metropoliteni” QSC-nin mətbuat xidməti bu gün, 1 iyul tarixində yayıb.
Bakı Metropoliteni sərnişinləri vaqonları tullantılarla çirkləndirməməyə çağırır. Eyni zamanda, stansiyalarda və qatarlarda oturacaqların və tutacaqların, eləcə də əllə təmasda olan digər səthlərin təmiz saxlanması vacibdir.
“Günümüzün aktual məsələlərindən biri sanitar-gigiyenik qaydalara riayət olunmasıdır. Bu, metropolitendə hər bir sərnişinin sağlamlığının əsas meyarlarından biridir. Bir sərnişinin diqqətsizliyi və yaxud biganəliyi yüz minlərlə insanın, o cümlədən hər birimizin evinin sakini və qonağı kimi metropolitendən istifadə edən ailə üzvlərimizin və yaxınlarımızın sağlamlığına xələl gətirə bilər”, - müraciətdə vurğulanıb.
