Bakıdan qaranquş və şanapipik quş növlərinin yox olmasının səbəbi məlum olub. Bu haqda 12 may tarixində APA məlumat verib.
Son iki ildə Bakıya baharın müjdəçisi olan qaranquşların gəlməməsi ilə bağlı Azərbaycan Milli Elmlər Akademiyasının Quru Onurğalıları Laboratoriyası açıqlama verib. Quşların gəlməməsinin əsas səbəbi pandemiya zamanı aparılan dərmanlamalar və iqlim dəyişikliyidir.
“Koronavirus pandemiyası ilə bağlı Bakıda mütəmadi olaraq dərmanlama işləri aparılıb. Quşların yaşayışı üçün əsas faktorlar yem mənbəyidir, pandemiya dövrünə isə dərmanlama işlərinin aparılması bu quşların dar qida arsenalını məhv etdi. Bu quşların qidalandığı ağcaqanadlar yoxdursa, deməli, o yerdə qaranquşlar da yoxdur. Güclü istiləşmə səbəbindən Azərbaycanda da bir neçə quş növü itirilmək üzrədir”, - deyə Laboratoriyanın biologiya üzrə elmlər doktoru Tahir Kərimov bildirib.
Tahir Kərimov qeyd edib ki, pandemiya ilə bağlı aparılan dərmanlamalara görə qaranquşlarla yanaşı şanapipiklər də Bakıya gəlmir.
