Bakıda 1 iyun - Uşaqların Beynəlxalq Müdafiəsi Günü ilə bağlı “Gələcək uşaqlara məxsusdur” adlı şənlik keçirilib. Bu haqda BakuPlus.az Report-a istinadən bu gün, 2 iyun tarixində xəbər verir.
Tədbir Heydər Əliyev Fondunun vitse-prezidenti, IDEA İctimai Birliyinin təsisçisi və rəhbəri Leyla Əliyevanın təşəbbüsü ilə yeni Bakı Zooloji Parkında təşkil olunub.
Şənliyə şəhid və qazi uşaqları, 11 nömrəli xüsusi təhsil məktəbindən, 2 saylı internat məktəbindən, 1, 2 və 3 saylı uşaq evlərindən ümumilikdə 500-ə yaxın uşaq qoşulub.
Zooparkın müxtəlif məntəqələrində qurulan pavilyonlarda ziyarətçilər oyunlara və yarışlara qatılaraq hədiyyələr qazanıblar.
Cizgi filmi personajlarının iştirakı şənliyi daha da rəngarəng edib, qonaqların diqqətini müxtəlif viktorina və maraqlı oyunlara cəlb edib.
Bundan əlavə, balacalar onlar üçün təşkil olunan ustad dərslərində də iştirak ediblər.
Daha sonra, açıq havada heyvanların xarici quruluşları ilə bağlı geniş məlumat əldə edən kiçik ziyarətçilərə heyvanlarla yaxından təmasda olmaq və onlara qayğı göstərmək şansı verilib.
