“Sinif yoldaşımla danışırdım. Birdən Nigarın sevgilisi yazıb kimliyimi soruşdu”.
Bakuplus.az-ın əldə etdiyi məlumata görə, bu sözləri məhkəmə qarşısında İlqar Əfəndiyevi (ad şərtidir) bıçaqlamaqda təqsirləndirilən Nicat Əsgərov (ad şərtidir) deyib.
Belə ki, hadisə Bakı şəhəri, R.M.Sadıqov adına 136 nömrəli məktəbin yaxınlığında qeydə alınıb. 2009-cu il təvəllüdlü Nicat Əsgərov bu ilin aprelin 25-də sinif yoldaşı Nigar Camalova ilə (ad şərtidir) “Instagram”da yazışıb. Onların yazışdığını Nigarın sevgilisi İlqar görüb. İlqar Nicata öz profilindən yazaraq nalayiq söyüşlər işlədib. Daha sonra, məktəbin yaxınlığındakı parkda görüşüblər. Mübahisə zamanı Nicat İlqarı 2 dəfə bıçaqlayıb.
Təqsirləndirilən şəxsə qarşı Cinayət Məcəlləsinin 126.2.4 və 221.3-cü (qəsdən sağlamlığa ağır zərbə vurma) maddəsi ilə cinayət işi açılıb. Məhkəmə istintaqına Bakı Ağır Cinayətlər Məhkəməsində hakim Fərid Namazovun sədrliyi ilə baxılıb.
Məhkəmə istintaqı zamanı təqsirləndirilən Nicat Əsgərova ifadə vermək üçün şərait yaradılıb. O, törətdiyi əməldə özünü təqsirli bilərək ifadəsində deyib:
“Sinif yoldaşım Nigarla “Instagram”da yazışırdıq. Bir də gördüm ki, Nigarın sevgilisi İlqar mənə yazıb kim olduğumu soruşdu. Mən də Nigarın sinif yoldaşı olduğumu dedim. Bundan sonra aramızda mübahisə yarandı. İlqar məni 136 nömrəli məktəbin yanındakı parka dəvət etdi. Tək gəlməyimiz barədə razılaşdıq. Mən hər ehtimala yanımda bıçaq götürdüm. Parka gedəndə İlqarın tək olmadığını gördüm, dostları yanında idi. Tək qalıb döyüləcəyimdən qorxduğum üçün bıçaqla İlqarın ayağından vurmaq istədim. Amma bıçaq onun kürəyinə dəydi. Əməlimdən peşmanam”.
Məhkəmədə zərərçəkmiş şəxs qismində dindirilən İlqar Əfəndiyev ifadəsində göstərib:
“Nigarın “Instagram”ına Nicatdan mesaj gəldiyini gördüm. Dərhal həmin hesabdan Nicata yazıb, kim olduğunu soruşdum. Aramızda mübahisə yarandığı üçün bir-birimizi söydük. 136 nömrəli tam orta məktəbin parkına çağırdım, əvvəlcədən tək gəlməyimizə dair razılaşdıq. Həmin yerə tək getmişdim, sadəcə parkda dostlarımla qarşılaşdım. Oturduğum zaman kiminsə arxadan kürəyimə vurduğunu hiss etdim”.
Məhkəmədə şahid Nigar Camalova ifadəsində deyib:
“Nicat mənim sinif yoldaşımdır. İlqar da mənim tanışımdır. Nicat mənə “Instagram”da dostluq atdı. Sinif yoldaşım olduğu üçün qəbul etdim. Nicat mənə yazanda İlqar gördü. Onlar mübahisə etməyə başladılar. Birinci söyüşü İlqar işlətdi. Daha sonra İlqar mənim hesabımdan çıxıb öz şəxsi “Instagram” hesabından Nicata yazdı. Bundan sonra baş verənlərdən məlumatlı deyiləm”.
Məhkəmə-psixoloji ekspertizasının rəyinə əsasən, təqsirləndirilən şəxsdə hər hansı psixi xəstəliyin əlamətləri aşkar olunmayıb.
Məhkəmədə şahidlər və zərərçəkmiş tərəflər ifadə verib. Verilən ifadələr və aparılan araşdırmalarla Nicat Əsgərov cinayətdə təqsirli bilinib.
Sonda məhkəmənin yekun qərarı ilə Nicat Əsgərov 3 il 6 ay müddətində azadlıqdan məhrum edilib. O, azadlıqdan məhrumetmə cəzasını ciddi rejimli cəzaçəkmə müəssisəsində çəkəcək.
Fidan İlqar
