Bakıda bağlanmış yola qoyulan əllə yazılmış lövhə sürücülərdə çaşqınlıq yaradıb.
Bununla bağlı qafqazinfo.аz-a sakinlərdən biri müraciət edib.
Vətəndaşın sözlərinə görə, “Çermet” körpüsündən Heydər Əliyev prospektinə gedən yolda əl yazısı ilə “Yol bağlıdır” lövhəsi qoyulub:
“Əl yazısı uzaqdan görünmür və sürücüləri çaşdırır. Bu, dövlət qurumlarının öz işlərinə qeyri-ciddi yanaşmasını göstərir".
Azərbaycan Avtomobil Yolları Dövlət Agentliyindən bildirilib ki, qurum həmin ərazidə hər hansı iş aparmır və yola nişan quraşdırmayıb.
İri Şəhərlərin Birləşmiş Su Təchizatı Xidməti də sözügedən ünvanda iş aparmadığını açıqlayıb: “Qeyd olunan ərazidə İri Şəhərlərin Birləşmiş Su Təchizatı Xidməti tərəfindən heç bir iş görülmür. Oradakı xəbərdaredici nişan da Xidmətə aid deyil”.
