Bakı şəhəri, Qaradağ rayonu ərazisində yerləşən “Binə” ticarət mərkəzində yaşayan qadından 70 pişik götürülüb.
Ticarət mərkəzində plastik materiallar, karton və boş butulkalar yığıb satan Yardımlı rayon sakini, 47 yaşlı Z.Yusifovanın həmin ticarət mərkəzində yaşayarkən gecəqonduda saxladığı 70 baş pişik avtomobilə yüklənərək naməlum istiqamətə aparılıb.
Verilən məlumata görə, qadın evə gələrək pişiklərin aparıldığını görüb və ticarət mərkəzinin rəhbərliyinin ünvanına qeyri-etik ifadələr səsləndirib. Hadisə yerinə gələn polis əməkdaşları qadını patrul maşını ilə polis bölməsinə aparıblar. Qadın barəsində inzibati protokol tərtib edilib və Qaradağ rayon məhkəməsinin qərarı ilə 200 manat məbləğində cərimə edilib.
Bundan əvvəl ticarət mərkəzinin rəhbərliyi və ərazidə xidmət aparan polis əməkdaşları Yusifovaya pişiklərin ticarət mərkəzinin ərazisindən çıxarılması barədə göstəriş veriblər.
