Son zamanlar, xüsusən şəhər mərkəzlərində və yüksəkmərtəbəli binalarda yanğın hadisələrinin artması ciddi narahatlıq doğurur. Bu hadisələr bir çox hallarda böyük faciələrə səbəb olur və həm fiziki, həm də maddi zərərlərə yol açır.
Yanğının səbəbləri çox müxtəlif ola bilər, amma ən çox qarşılaşılanlar kimi texniki nasazlıqlar, elektrik avadanlıqlarının istifadə qaydalarına riayət edilməməsi, tikinti materiallarının keyfiyyəti və ya bina sakinlərinin təhlükəsizlik qaydalarına əməl etməməsi göstərilir.
Bəs əsil səbəb nədir? Qarşısını almaq üçün hansı tədbirlər görülməlidir?
Mövzu ilə bağlı Bakuplus.az-a açıqlama verən təhlükəsizlik məsələləri üzrə ekspert Elmar Nurəliyevin sözlərinə görə, ümumiyyətlə yanğınların baş verməsinin səbəbi yanğın təhlükəsizlik qaydalarının pozulmasıdır:
[caption id="attachment_158118" align="alignnone" width="640"]
Elmar Nurəliyev[/caption]
“Təhlükəsizlik qaydalarının pozulması sonda nəticə etibarı ilə yanğının baş verməsinə səbəb olur. Ona görə də bütün təyinatlı obyektlər - istehsalat sahələri, zavod, fabrik, iş yerləri və yaşayış binaları yanğın təhlükəsizlik qaydalarına ciddi riayət etməlidir.
Yanğınların da əksəriyyəti elektrik qısaqapanması səbəbindən baş verir”.
E.Nurəliyev əlavə edib ki, elektrik təsərrüfatı daim saz vəziyyətdə olmalıdır:
“Çoxmənzilli yaşayış binalarının elektrik təsərrüfatı və fərdi yaşayış evlərində yoxlanışlar aparılmalıdır. Təmir zamanı keyfiyyətli elektrik naqillərindən istifadə edilməlidir. Elektrik təsərrüfatında təmir işləri yalnız ixtisaslaşmış müəssisə tərəfindən həyata keçirilməlidir.
Bununla yanaşı elektrik şəbəkəsinin normadan artıq yüklənməsinə yol verilməməlidir. Normadan artıq yüklənərsə qızma, qısaqapanma, alışmaya gətirib çıxara bilər”.
“Müasir dövrün tələbinə uyğun olaraq evdə elektriklə çalışan məişət əşyaları, digər elektrik avadanlıqları, kondisioner, paltaryuyan və qabyuyan maşın, televizordan istifadə edilir. Bunların hər biri eyni an çalışarsa, - elektrik təsərrüfatı, elektrik tutumu, elektrik qoruyucuları və elektrik şəbəkəsi saz vəziyyətdə olmazsa, - problem ola bilər. Keyfiyyəti elektrik yoxdursa, qızma, qısaqapanma və alışıb yanma ola bilər.
Sıfırdan təmir edənlər də keyfiyyətli elektrik naqillərindən istifadə etməlidir. Ev alanlar mütəxəssis çağırıb, yoxlanış aparmalıdır. Mütəxəssislər də elektrik şəbəkəsini yoxlayıb, sınaq protokolu tərtib etməlidir. Belə olduğu halda nöqsanlar bilinəcək”, - deyə E.Nurəliyev fikrini tamamlayıb.
Nəzrin Vahid
