Cəmiyyətin illərdir davam edən problemlərindən biri “Camaat nə deyər” düşüncəsidir. Elə bu düşüncənin yaratdığı digər problem isə bəzi valideynlərin övladlarının xəstəliyi olmasından utanmasıdır. Bəzi qız valideynləri övladlarını ərə verəndə, oğul övladı olanlar isə qız alanda xəstəliyi gizli saxlayırlar. Xəstəliyi gizli saxlamaq bəzən insanların şəxsi həyatlarındakı məsələləri qorumaq, utanmaq və ya başqalarının onlara necə yanaşacağı barədə narahatlıq hissi ilə bağlı ola bilər.
Bu barədə psixoloq Gülər Məmmədova Bakuplus.az-a açıqlama verib:
[caption id="attachment_166072" align="alignnone" width="640"]
Psixoloq Gülər Məmmədova[/caption]
“İnsan fitrətində hər zaman narahat düşüncələr hökm sürüb. İnsanlar daim müəyyən qayğılar içində yaşayır, ictimai qınağı düşünüblər. Əslində, bu hər kəsin problemi olub. Deyərdim ki, illər öncə ilə müqayisədə bu günün insanı artıq öz fərqliliyini duyduğuna görə ictimai qınağa o qədər də əhəmiyyət vermir. Yəni qeyd olunan “camaat nə deyər”, “bizi qınayarlar” kimi fikirlər tarixə qovuşur.
Buna baxmayaraq, belə fikirlə yaşayan insanların sayı az deyil. Belə insanlar daima həyəcan pozuntusu yaşayırlar. Öz həyatlarını deyil, ictimai mühitin baxışlarını təmin etmək üçün gözdən pərdə asırlar. Göstəriş üçün yaşayırlar. Bu cür insanlar digər şəxslərin rəyini almadan yaşaya bilmirlər. Mənfi rəy olduqda isə özlərini bağışlamırlar”.
Fidan İlqar
