“Mən heç bilmirdim ki, bizi çəkirlər”.
Bunu idman.biz-ə cüdo üzrə U-18 Azərbaycan çempionatının iştirakçısı Tövsiyyə Babayevanın anası Svetlana Babayeva deyib.
O, yarışın gedişində qızı ilə çəkilən görüntülərin məşhurlaşmasından danışıb: “Həmin an yalnız Tövsiyyənin çıxışını düşünürdüm. Ağlıma da gəlməzdi ki, bu görüntülərə bütün ölkə baxa bilər. Hamı mənə bu videonu göndərir, hətta xaricdə yaşayan qohumlarım belə. Qızım iki günə məşhur oldu. Biz onu dörd yaşında gimnastikaya qoymuşduq. Səkkiz-doqquz yaşı olanda isə gimnastikadan çıxarıb cüdoya yazdırdım. Hələ ilk başladığı dövrdə məktəbdə müəllimlər Tövsiyyəyə deyirdi ki, sənə cüdo lazım deyil, incə qızsan, davam etsən, gələcəkdə kobud olacaqsan. Mən isə həmişə onu bu yolda dəstəkləmişəm. Demişəm ki, heç kimə qulaq asma, əsas odur ki, sən çalış. Tez-tez deyirlər ki, cüdo ilə məşğul olan qızlar kobud olur. Bu söz mənə çox toxunur. Fikrimcə, davranış tərbiyəyə bağlı olan məsələdir. Hər şey ailədən gəlir”.
Svetlana xanım idmanda ailə dəstəyinin mühüm olduğunu qeyd edib: “Mən insan resursları üzrə mütəxəssis işləyirdim. Tövsiyyə cüdo ilə məşğul olmağa başladıqdan sonra ona dəstək olmaq üçün işdən çıxmışam. İdman çox çətin sahədir. Uşaqda ciddi intizam olmalıdır. Vaxtında məşqlərə getməli, qidalanmasına fikir verməli, yuxu rejiminə diqqət etməlidir. Bunlara nəzarət edən bir adamın olması mütləqdir. Bu yolu tək getmək çox çətindir. Mənim bir oğlum da var, ancaq onun cüdo ilə məşğul olmasını qətiyyən istəməzdim. Çünki ikinci dəfə o yolu getməyə gücüm yoxdur. İki övladı da idmanda uğur qazanan valideynlərə heykəl qoymaq lazımdır. Mən hələ bir uşaq üçün nə qədər həyəcan keçirirəm. Tövsiyyənin uğur qazanması üçün valideyn olaraq əlimdən nə gəlirsə, edirəm və bundan sonra da etməyə hazıram”.
Qeyd edək ki, Tövsiyyə Babayeva (52 kq) yarışı bürünc medalla başa vurub.
