Ekologiya və Təbii Sərvətlər Nazirliyinin Bioloji Müxtəlifliyin Qorunması Xidməti Hövsan və Türkan qəsəbələri ərazisində sudan və tələf olmuş balıqlardan götürülən nümunələrin analizlərinin nəticələrini açıqlayıb.
Bildirilir ki, balıqların kütləvi ölümü suda həll olunmuş oksigenin miqdarının qeyri-optimal səviyyəyədək azalması ilə bağlıdır. Balıq nümunələri üzərində aparılan analizlər zamanı infeksion xəstəliklərin törədiciləri, zəhərlənmə halları və kənar fiziki təzyiqlər aşkar edilməyib.
Su nümunələrinin analizinə görə isə suyun temperaturunun yüksək olması nəticəsində suda həll olunmuş oksigenin miqdarı qeyri-optimal səviyyəyədək azalıb. Bu, balıqların ölümünə səbəb kimi göstərilib.
15:00 - Dənizin sahilləri ölü balıqlarla doludur: ETSN hələ də məsələni araşdırır – VİDEO
Xəzər dənizinin sahilində, Bakının Hövsan və Türkan qəsəbələri ərazisində kütləvi balıq tələfatı qeydə alınıb. Bununla bağlı müvafiq videogörüntülər sosial şəbəkələrdə yayılıb. Bu haqda bu gün, 8 iyul tarixində Bakuplus.az Oxu.az-a istinadən məlumat verir.
Ekologiya və Təbii Sərvətlər Nazirliyinin mətbuat katibi İradə İbrahimova faktı təsdiqləyib.
Onun sözlərinə görə, səbəbləri öyrənmək üçün Xəzər Kompleks Ekoloji Monitorinq İdarəsinin mütəxəssisləri artıq hadisənin baş verdiyi əraziyə baxış keçiriblər. Su nümunələri və ölmüş balıqlardan nümunələr götürülüb. Nəticələri əldə etdikdən sonra ictimayyətə ətraflı məlumat veriləcək.
Analoji vəziyyət iyundan müşahidə olunsa da, nazirlik bu günə kimi heç bir ətraflı məlumat təqdim etməyib.
Biologiya elmləri doktoru professor Mehman Axundov qeyd edib ki, Hövsan və Türkan sahilyanı ərazilərində oxşar balıqların kütləvi şəkildə tələf olması halları son 4-5 il iyunda və iyulun əvvəllərində müşahidə olunub.
“Bu, onunla bağlıdır ki, həmin akvatoriya çox dayaz dəniz sahəsidir və burada sahildən dəniz boyu haradasa bir metr dərinlik üçün ən azı bir kilometr məsafə qət etmək lazımdır”, – deyə professor Axundov izah edib.
Ekspert onu da qeyd edib ki, Bakı buxtası yarımqapalı olduğundan yay aylarında burada çox zəif su mübadiləsi müşahidə olunur. Nəticədə dayaz sahil ərazilərində suyun temperaturu yüksəlir və suda oksigenin miqdarı azalır.
Professor Axundov mühüm bir cəhəti də vurğulayıb: “Dəniz balıqları növləri, məsələn kilkələr, kefallar və s., əsasən, iyuldan sentyabra qədər kürü tökmək üçün sahilyanı dayaz hissələrə miqrasiya edir. Burada onlar üçün müsbət olmayan bir şəraitlə rastlaşdıqları üçün məhv olurlar”.
Alim bu problemi də iqlim dəyişikliyi ilə əlaqələndirib.
“Bildiyiniz kimi, Xəzər dənizi dayazlaşır, bu zaman dərinlik azalır, su daha çox qızdığı üçün sudakı oksigenin miqdarı azalır. Ona görə də bu cür mənzərələr meydana çıxır”, – deyə Mehman Axundov fikrini yekunlaşdırıb.
