Abşeron rayonu, Xırdalan şəhər 10 nömrəli tam orta məktəbin sabiq direktor əvəzi Əzizə Abdıyevanın 98 min manatını mənimsəyən şəxslərə hökm oxunub.
Qaynarinfo.az-ın məlumatına görə, ittihama əsasən, Bakı şəhər sakini Hökümə Əliyeva tanışları Hicran Süleymanova, Aydın Cəfərov, Elsəvər Usubov, Könül Əliyeva və Şahlar adlı şəxslərlə əlbir olaraq Əzizə Abdıyevaya qarşı külli miqdarda dələduzluq ediblər.
Elsəvər Usubov bir neçə il əvvəl dünyasını dəyişdiyi üçün istintaqa cəlb edilməsinə xitam verilib.
Təqsirləndirilən şəxslər özlərini elm və təhsil nazirinin müavini Firudun Qurbanovun yaxın adamları kimi təqdim edərək, zərərçəkmiş şəxsin 43.000 manatını “diplomun təsdiqi”, 55.000 manatını isə “direktor vəzifəsinə təyinatı” üçün alıblar. Həmin pulları isə mənimsəyiblər.
Aparılan araşdırma zamanı məlum olub ki, Hicran Süleymanova nazirliyin sabiq əməkdaşı, Aydın Cəfərov isə "Gənc Alim" Mənzil İstehlak Kooperativinin İdarə Heyətinin sədri olub.
Məhkəmənin qərarı ilə təqsirləndirilən şəxslər Cinayət Məcəlləsinin 178.3.2-ci maddəsində nəzərdə tutulan cinayət əməlini törətməkdə təqsirli biliniblər. Hicran Süleymanova 5 il 6 ay, Könül Əliyeva 5 il, Aydın Cəfərov 6 il 8 ay müddətinə həbs cəzası alıblar. Onlar cəzalarını ümumi rejimli cəzaçəkmə müəssisəsində çəkəcəklər. Şahlar adlı şəxsə isə təyin edilmiş 5 il müddətə azadlıqdan məhrum etmə cəzası ev dustaqlığı ilə əvəz edilib.
Qeyd edək ki, Əzizə Abdıyevanın atası Elbəy Abdıyev Abşeron rayonu Məmmədli kənd tam orta məktəbinin direktorudur və rayonda tanınmış şəxslərdəndir.
