Elektron ticarət (e-ticarət) internet vasitəsilə malların və xidmətlərin alqı-satqısı prosesidir. Bu sahə, fiziki mağazalardan fərqli olaraq, onlayn platformalar üzərindən məhsul və xidmətlərin satılması və alınması əməliyyatlarını əhatə edir. Elektron ticarət biznesləri adətən saytlar, mobil tətbiqlər və ya sosial media platformaları vasitəsilə fəaliyyət göstərir.
Ümumiyyətlə, elektron ticarət nədir? Bu sahəyə başlamaq üçün ilk addım necə atılmalıdır?
Bu barədə Bakuplus.az-a açıqlama verən marketinq üzrə ekspert Vaqif Əzizov deyib ki, elektron ticarətə başlamaq üçün bir sıra ilkin addımlar var:
[caption id="attachment_162638" align="alignnone" width="640"]
[/caption]
“Elektron ticarət indiki dövrdə çox yayılıb. Əksər insan elektron ticarətlə gündəlik alış-veriş edir, istədiklərini rahatlıqla sifariş edə bilir. Elektron ticarət ənənəvi ticarət modelindən fərqli olaraq, satıcı ilə alıcını coğrafi məntəqədən azad edir. Yəni hər hansı məkana getməyə ehtiyac qalmır. Nəticədə 7/24 işləyən bazarda alışa imkan verir. Elektron ticarətə misal olaraq ölkə daxilində “Trendyol”, “Umico”, dünya miqyasında yayılmış “Amazon” kimi platformaları göstərmək olar.
Elektron ticarətə başlanan zaman ilk addım bazar araşdırılmasının edilməsidir: satışa çıxarılacaq məhsulların alternativləri nələrdir, həmin məhsula tələbat varmı. Bu suallara cavab tapdıqdan sonra mağazanı açacağımız platformanı seçirik. Platforma da seçildikdən sonra mağazanın brendini qurmalıyıq. Buna aiddir loqo, brendin adı, rənglərin uyğunluğu.
Bundan sonra ediləcək iş rəqəmsal marketinqin planının qurulmasıdır. Mağazanı açandan sonra reklamlarını harada aparacağınızı dəqiqləşdirməlisiniz. Təbii ki, məhsul satırıqsa, müştəridən ödənişi almaq yöntəmini fikirləşməliyik. Logistika, çatdırılma sistemi qurulmalıdır.
Əgər qlobal elektron ticarət platformasında istifadə ediriksə, beynəlxalq yükdaşımaları üzərindən plan qurmalıyıq. Müştəri məmnuniyyətini öyrənməliyik. Bu sahibkara yeni müştərilər qazandırır”.
Fidan İlqar
