“Formula-1" marşalları üçün təlim keçirilir. Bu haqda 17 may tarixində APA məlumat verib.
Bakı şəhərində keçiriləcək “Formula-1 Azərbaycan Qran Prisi 2022” yarışlarına hazırlıq işləri çərçivəsində Bakı Şəhər Halqası Əməliyyat Şirkəti və Bakı Marşal Klubu marşalların bacarıq və təcrübələrinin artırılması məqsədilə tədbir və təlimlərin təşkilinə start veriblər.
FHN Akademiyasında yanğından mühafizə və xilasetmə üzrə ixtisaslaşmış marşallar üçün təlimlər keçirilir.
“Təlimlərin keçirilməsində məqsəd yarışlar zamanı baş verə biləcək fövqəladə hallarla bağlı əməliyyat və qarşılıqlı fəaliyyət planlarının reallığının yoxlanılması, yanğınların qarşısının alınması və nəticələrinin çevik şəkildə aradan qaldırılması üçün marşalların peşəkarlığının daha da artırılmasıdır”, - FHN-in Baş əməliyyat idarəsinin rəis müavini polkovnik Ağali Hüseynov bildirib.
Təlimlər həm nəzəri, həm də praktiki hissələrdən ibarətdir. Bu təlimlərdə ümumilikdə 191 nəfər iştirak edib. Praktiki hissədə yanğın təhlükəsizliyi və xilasetmə işlərində istifadə olunan xüsusi texnika və avadanlıqlarla davranış qaydaları əyani şəkildə izah olunub.
