Baş Prokuror yanında Korrupsiyaya qarşı Mübarizə Baş İdarəsinin Müslüm Maqomayev adına Azərbaycan Dövlət Akademik Filarmoniyasında keçirdiyi əməliyyat nəticəsində bir nəfər həbs olunub. Bu haqda bu gün, 9 iyul tarixində Bakuplus.az məlumat verir.
İstintaq nəticəsində etibar edilmiş külli miqdarda özgə əmlakının talanması, vəzifəli şəxsin xidməti vəzifələrinin icrası ilə əlaqədar özü və ya üçüncü şəxslər üçün qanunsuz üstünlük əldə etmək məqsədilə öz qulluq səlahiyyətlərindən qulluq mənafeyinə qəsdən zidd olaraq istifadə etməsi, külli miqdarda rüşvət alma və vəzifəli şəxs tərəfindən tamah və sairə niyyətlə rəsmi sənədlərə bilə-bilə yalan məlumatların daxil edilməsi kimi cinayətlər aşkar olunub.
Həmin cinayətlərin əlamətlərini əks etdirən kifayət qədər dəlillərin olması nəzərə alınaraq fakt üzrə Azərbaycan Respublikası CM-in 179.3.2, 308.1, 311.3.3 və 313-cü maddələri ilə cinayət işi başlanıb.
Nəticədə filarmoniyanın əməkdaşı Rəşad Məmmədov barəsində məhkəmənin qərarı ilə 5 iyul tarixində həbs qətimkan tədbiri seçilib. Araşdırma davam edir.
