Bakıda polisə gecə vaxtı zəng edən bina sakini qonşusundan şikayət edib. Bu haqda BakuPlus.az Qafqazinfo-ya istinadən bu gün, 18 may tarixində xəbər verir.
17 may tarixində Bakı şəhəri, Nəsimi rayonunda yerləşən çoxmərtəbəli binalardan birinin sakini gecə saat 4-də polisə zəng edərək qonşusunun onun 17-ci mərtəbədə yaşadığı evinin qapısını yandırmaq istədiyini deyib.
Polis qrupu deyilən mənzilə gəldikdən sonra məlum olub ki, N.Davudov sərxoş haldadır və dedikləri həqiqəti əks etdirmir. Əslində isə alt mərtəbədəki qonşusu daim onun evindən səs gəldiyini deyərək şikayətlər edir. Bu səbəbdən də polislərdən həmin qonşuya xəbərdarlıq edilməsini istəyir.
Davudov polis şöbəsinə dəvət edilməsinə baxmayaraq, polisin tələbinə qarşı çıxıb.
Ərazi üzrə 21-ci Polis Bölməsinə aparılan N.Davudov barəsində İnzibati Xətalar Məcəlləsinin 510 və 535-ci (Xırda xuliqanlıq və Polis işçisinin qanuni tələbinə qəsdən tabe olmama) maddələri ilə protokol açılıb və məhkəməyə göndərilib.
Nəsimi Rayon Məhkəməsinin 17 may tarixli qərarı ilə N.Davudova 10 sutka həbs cəzası verilib.
