2024-cü il dekabrın 24-də Prezident İlham Əliyevin fərmanı ilə “Gömrük tarifi haqqında” qanuna edilən dəyişikliklər qüvvəyə minib. Bu dəyişikliklərə əsasən, enerji sektorunda yaşıl texnologiyaların tətbiqi və ekoloji nəqliyyat vasitələrinin istehsalı ilə bağlı gömrük tariflərində yeni güzəştlər nəzərdə tutulub.
Mövzu ilə bağlı avtosfer.az-a danışan iqtisadçı ekspert Rəşad Həsənov bildirib ki, dəyişikliyə əsasən üç əsas istiqamət üzrə tarif güzəştləri təklif edilir:
1. Dövlət-özəl əməkdaşlığı çərçivəsində 30 ildən artıq olmayan müddət ərzində idxal olunan texnika və avadanlıqların tariflərdən azad edilməsi;
2. Yerli yaşıl və təmiz enerji istehsalçıları tərəfindən idxal olunan texnika və avadanlıqların gömrük tarifindən azad edilməsi;
3. 2025-ci ildən Azərbaycanda istehsal ediləcək yaşıl avtobusların hissələrinin 8 il müddətinə tariflərdən azad edilməsi.
Ekspert bu dəyişikliklərin gömrük güzəştlərinin əhatə dairəsini genişləndirəcəyini və gələcəkdə tarif siyasətlərinin təkmilləşdirilə biləcəyini qeyd edib. Bu, xüsusilə iri sahibkarlıq subyektləri üçün əlverişli imkanlar yaradacaq.
