Son günlər ölkə gündəmini zəbt edən mövzulardan biri də əməliyyatdan sonra sağlamlığına zərər gələn, həyatını itirən şəxslərdir. Elə ötən gün burun çəpərindəki əyriliyi aradan qaldırmaq üçün əməliyyat olunan, daha sonra dünyasını dəyişən 30 yaşlı Nəzrin Mansurova kimi...
Onun estetik əməliyyatdan sonra həyatını itirməsi cəmiyyətdə geniş müzakirələrə səbəb olub. Hadisə zamanı əməliyyatı həyata keçirən həkim Sənan Mehdiyev ciddi ittihamlarla qarşı-qarşıyadır.
Maraqlıdır, bu kimi vəziyyətlərdə həkimlər niyə məsuliyyətə cəlb edilmir?
Məsələ ilə bağlı Bakuplus.az-a açıqlama verən hüquqşünas Ruslan Mustafayev bildirib ki, ekspertiza belə hadisələrdə düzgün rəy vermir:
“Bu məsələ son zamanlar çox aktualdır. Həkimlərin düzgün qoymadığı diaqnoz, doğru aparılmayan əməliyyat nəticəsində pasiyentlərin ciddi xəsarət aldığı, həyatını itirdiyi faktlarla tez-tez qarşılaşırıq. Düzgün diaqnozun qoyulmaması, əməliyyatın düzgün aparılmamasında birbaşa həkim məsuliyyət daşıyır. Əksər hallarda pis nəticələrlə sonlanan əməliyyatlar özəl klinikalarda keçirilir. Təbii olaraq həmin klinikalar bu məsələdə məsuliyyət daşıyır.
Əgər düzgün qoyulmayan diaqnoz nəticəsində xəstə ölübsə və ya ağır xəsarət alıbsa, cinayət işi açılır və açılmalıdır. Belə olan təqdirdə burada əsas rolu oynayan hal ekspert rəyidir. İstintaqı aparan orqan rəy alınması üçün ekspertizaya müraciət edir. Rəy əsasında araşdırma aparılır. Əgər nəticələr məhz həkimə yönəlirsə, bu zaman həkim məsuliyyətə cəlb edilir. Bu məsələnin şəxsə dəymiş maddi və mənəvi ziyanı həmin həkimdən və klinikadan tələb edilə bilər.
Amma təəssüflər olsun ki, praktikada belə nəticələrə görə həkimlərin məsuliyyətə cəlb edilməsi halları ilə rastlaşmırıq. Bunun əsas səbəbi həmin ekspert rəyləri ilə bağlıdır. Əksər hallarda ekspertiza həkimlərin düzgün müalicə aparmaması, doğru əməliyyat etməməsini müəyyən etmir. Ekspertiza rəylərinin bu cür verilməsinin nə ilə bağlı olduğunu deyə bilmərəm. Bu məsələ insanlar arasında kifayət qədər mənfi qarşılanır. Onsuz da həmin rəylərin düzgünlüyü şübhə doğurur. 10 belə haldan birində həkim səhvinin müəyyən edilməməsi mümkünsüzdür. Bir vətəndaş olaraq biz də belə məsələlərin düzgün araşdırılmasının tərəfdarıyıq”.
