İran-İsrail müharibəsinin başlamasından sonra tərəflərin bir-birinə atdığı ballistik raketlərin təsiri nəticəsində Azərbaycanda da ekoloji tarazlığın pozulduğu və yaxud pozula biləcəyi ilə bağlı iddialar səslənir.
Bəs bu iddialar nə qədər məntiqlidir? Bu iddialarda həqiqət yükü varmı?
Ekologiya və Təbii Sərvətlər Nazirliyi yanında İctimai Şuranın üzvü Rövşən Abbasov Bakuplus.az-a açıqlamasında bildirib ki, o ərazidə gedən müharibənin Azərbaycana elə bir təsiri ola bilməz:
“Çünki məsafələr kifayət qədər böyükdür. Nə havanın keyfiyyətinə, nə də torpaq və suyun keyfiyyətinə təsir mümkündür. Çünki, bizə İran ərazisindən bir neçə çay olmaqla, çox çaylar gəlmir. Nüvə qəzalarına gəlincə, burada məsələ başqadır. İndiyə qədər aparılan müşahidələr nə Azərbaycanda, nə də İranda radiasiya fonunun yüksək olduğunu göstərir”.
Qeyd edək ki, Fövqəladə Hallar, Ekologiya və Təbii Sərvətlər, Rəqəmsal İnkişaf və Nəqliyyat nazirlikləri Mətbuat xidmətləri yaydıqları birgə məlumatda son günlərdə aparılan müayinələr zamanı bu vaxtadək ətraf mühitdə təbii radiasiya fonunun artması hallarının qeydə alınmadığı bildirilmişdi.
Xatırladaq ki, İran-İsrail müharibəsi iki gün öncə başa çatıb.
Kamran Rza
