“Bir neçə gün öncə dayım, xalq artisti İslam Rzayevin 90 illik yubileyi oldu. 16 ildir ki, dayım həyatda yoxdur. Müğənni Xatirə İslam dayımı yada saldı, efirdə danışıb ağladı, sonradan məzarını ziyarət edib video da paylaşdı. Bilmirəm bunları göstəriş üçün etdi yaxud da ürəkdən. Amma əsas odur onu yad etdi”.
Bu fikirləri Moderator.az-a açıqlamasında xalq artisti İslam Rzayevin bacısı qızı Arzu Şəmiyeva deyib.
Arzu Şəmiyev İslam Rzayevin həyat yoldaşını ittiham edib:
“Xatirə xanım üzdə olan müğənnidir. O deyir ki, İslam müəllimin evinə gedirdim, həyat yoldaşı Tamara xanım mənə belə baxırdı, belə qabağıma yemək qoyurdu. İnstaqram səhifəsinə də yazdım ki, apardığın yeməklərdən verirdi də sənə! Tamaranın nəvələri gedib niyə aidiyyəti qurumlardan xahiş etmirlər ki, İslam Rzayevin 90 illik yubileyini qeyd etsinlər?! İstəyir Xatirəsi olsun, istəyir tələbələri olsun. Mən onun doğmasıyam, məni öz qızı kimi saxlayıb. Mənim əlimdən heç nə gəlmir. Sadə müəlliməm, ev istəmirik, maşın istəmirik, pul istəmirik. İstəyimiz təkcə budur ki, İslam Rzayevin 90 illik yubileyi yüksək səviyyədə keçirilsin. Aidiyyəti qurumlara, Milli Məclisin Mədəniyyət komitəsinə yubiley haqda müraciət etmişəm. Hələ ki, bir xəbər yoxdur. Bütün füzulililər ayağa qalxıb ki, bizim adımızdan da müraciət edin. Bəlkə aidiyyəti qurumlar Füzulidə onun adına bir küçə verəcək?! Bütün bunları yada salmaq lazımdır” deyə o bildirib.
Arzu Şəmiyeva deyib ki, Tamara xanım Xatirə İslamdan hər toya görə pul alırmış: “Heç kim bilməsə də bəzi insanlar çox yaxşı bilir ki, Xatirə İslam o evə nələr daşımışdı. Dayıma görə yox, ikinci həyat yoldaşı Tamaraya görə! Dayımın bunlardan xəbəri yox idi! O adı götürə-götürə sən Xatirə İslam müəllimin doğmalarını araşdırmısan?! Amma Tamara “İslam” təxəllüsünə görə hər toy üçün Xatirədən pul alırdı ki, sən o ada görə məşhurlaşmısan! Belə hallar dayıma çox pis təsir edirdi. O insan adam idi. Özünü, sənətini pula satmırdı. Xatirə daşıyıb gətirirdi, gedəndən sonra dayım hirslənirdi. Dayımın heç kimin məşhurluğuna ehtiyacı yox idi. Bu cür sənətkarı yaddan çıxartmaq olmaz. Adını götürmüsənsə, Xatirə, get aidiyyəti qurumlardan xahiş et, ona yubiley keçirsinlər. Əgər xahiş etmirsənsə o adı üzərindən götür”.
