Son zamanlar mobil internet istifadəçiləri trafikin tez bitməsindən şikayətlənir. Deyilənə görə, hazırda eyni həcmdə olan mobil trafik bir neçə müddət öncə ilə müqayisədə daha tez sona çatır.
Bəs görəsən, bu məsələ necə tənzimlənir? Mobil trafikə hər hansısa nəzarət mexanizmi varmı?
Mövzu ilə bağlı Bakuplus.az-a açıqlama verən İT mütəxəssisi Vahid Qasımovun sözlərinə görə, mobil tariflər gün ilə yox, istifadə olunan trafik ilə ölçülür:
“İstifadəçinin istifadə etdiyi MB miqdarı ilə ölçülür. O da birbaş olaraq istifadə olunan resurslardan asılıdır. İstifadəçi ancaq saytlara baxsa, “email” istifadə etsə və “Messenger”lərdə yazışsa, çox az trafik istifadə olunacaq. Çünki mətn tipli məlumatlar az həcmli olur. Multimedia məlumatları onlardan qat-qat çox yer tutur.
İstifadəçi mətn mesajları əvəzinə səsli mesajlar göndərsə, “Instagram”da şəkillərə yox, videolara baxılsa, “Facebook” əvəzinə “TikTok” istifadə olunsa və telefon danışıqları əvəzinə “WhatsApp” danışığı tərcih olunsa, daha çox trafik istifadə olunacaq”.
Mütəxəssis qeyd edib ki, hər bir smartfonda aylıq trafikin miqdar və faiz olaraq nəyə xərcləndiyinə baxmaq mümkündür:
“Trafikin çox ya da az sərf olunması birinci növbədə əlbəttə ki, istifadə olunan məlumat növündən asılıdır. Amma ikinci bir səbəb, mobil internetin sürəti ilə əlaqədardır. İnternet sürəti daha yuxarı olduğu zaman videolar daha yüksək keyfiyyətlə açılır, bu da daha yüksək trafikin sərfiyyatında gətirir.
Trafik məsələsindəki iradlar qoca insanların “sovet vaxtında 100 manat maaş alırdıq, hər şeyə bəs edirdi. İndi pulun bərəkəti qaçıb” sözünə oxşayır. Bərəkəti qaçmayıb, yaşam standartı artıb. Qabaqlar edə bilmədiyin, ümumiyyətlə xəyalına gətirmədiyin şeyləri bu gün gündəlik olaraq etməyə başlayırsansa, aydın məsələdir ki, bunun müəyyən bir xərci olacaq”.
Nəzrin Vahid
