Gənclər və İdman Nazirliyinin Bakı Şəhər Gənclər və İdman Baş İdarəsinin (BŞGİBİ) sabiq rəisi Raqif Abbasov və sözügedən qurumun maliyyə-iqtisadiyyat sektorunun keçmiş müdiri Eldəniz Qulamovun cinayət işi üzrə məhkəmə hazırlıq iclasının vaxtı bəlli olub.
Bakuplus.az-ın məlumatına görə, iclas Bakı Ağır Cinayətlər Məhkəməsində hakim Eldar İsmayılovun sədrliyi ilə yanvarın 8-də keçiriləcək.
Raqif Abbasovla Eldəniz Qulamov Cinayət Məcəlləsinin 179.4-cü (mənimsəmə xüsusilə külli miqdarda törədildikdə) maddəsi ilə mühakimə ediləcək.
Gənclər və İdman Nazirliyi iş üzrə zərərçəkmiş qismində tanınıb. Raqif Abbasov 2007-ci ildən 2023-cü ilin iyun ayınadək BŞGİBİ-nin rəisi vəzifəsində çalışıb. Raqif Abbasovla Eldəniz Qulamovun ittiham edildiyi 179.4-cü maddəsində 10 ildən 14 ilədək müddətə azadlıqdan məhrum etmə cəzası nəzərdə tutulur.
