Bakıda 18 yaşlı oğlan “TikTok”da “Lotu Quli”ni söydüyü üçün bıçaqlanıb.
Bakuplus.az-ın əldə etdiyi məlumata görə, hadisənin istintaqı Bakı Ağır Cinayətlər Məhkəməsində keçirilib.
Belə ki, 2006-cü il təvəllüdlü İ.Həsənov (ad şərtidir) bu ilin yanvarında “TikTok”da “Lotu Quli”ni söyən Ədalət Babayevi (ad şərtidir) kafeyə görüşə çağırıb. Ədalətə “Lotu Quli”nin ünvanına nalayiq ifadələr işlətməsinə görə irad bildirib. Heç bir səbəb olmadan onunla mübahisə edib. Daha sonra Ədalətdən söyüşünə görə üzr istəməsini tələb edib. Buna razı olmayan Ədaləti çölə çıxaran zaman arxadan bıçaqlayıb.
İ.Həsənov Azərbaycan Respublikası CM-nin 126.2.4-cü (xuliqanlıq niyyəti ilə insan həyatı üçün təhlükəli olan qəsdən sağlamlığa ağır zərər vurma) maddəsi ilə təqsirləndirilib.
Məhkəmədə təqsirləndirilən şəxs qismində dindirilən İ.Həsənov özünü təqsirli bilib. O, ifadəsində göstərib ki, 16 yaşına qədər uşaq evində böyümüş, oradan çıxdıqdan sonra dayısı ilə qalmağa başlayıb.
“Yasamal ərazisində idim. Dostum Qılman gəlib dedi ki, bir nəfər “Lotu Quli”ni söyüb. Məndən bu məsələni həll etmək üçün gələ bilib-bilməyəcəyimi soruşdu. Mən də getdim. Orda söyən adamın Ədalət olduğunu öyrəndim. Söydüyünə görə üzr istəməsini tələb etdim. Ədalət təklifimi rədd etdiyi üçün onu küçədə bıçaqladım. “Lotu Quli” ilə tanışlığım olmasa da, etdiyim hərəkətlə fəxr edirəm. Hadisədən peşman deyiləm. Üzərimdə həmişə müdafiə üçün bıçaq gəzdirirəm. Mənim adımı polisə verdiyi üçün Əlini də bıçaqlamaq istəyirdim. Onun “mama uşağı” olduğunu gördükdən sonra fikrimdən daşındım”.
Məhkəmə iclasında zərərçəkmiş şəxs Ədalət Babayevin ibtidai istintaq dövründə verdiyi ifadə elan edilib. İfadədə göstərilir:
“Təxminən 2023-cü ilin oktyabr ayında “TikTok” sosial şəbəkəsində “Düzünə Rövşən” adlı profil səhifəsi açdım. Həmin profil səhifəsi mənə məxsus olub və o profildə Rövşən Lənkəranski kimi tanınan şəxsin fotolarını və videolarını paylaşırdım. Həmin profili istifadə etdiyim dövrdə tanımadığım bir neçə şəxslə mübahisəm olub. Lakin heç bir zaman telefonla danışığım və ya görüşüm olmayıb.
Bir gün “TikTok”da Rövşən Lənkəranskiyə aid şəkil və videolara baxdığım zaman həmin videonun koment hissəsində tanımadığım bir nəfərin Rövşəni söydüyünü gördüm. O, Rövşəni söydüyü üçün mən də “Lotu Quli”ni söydüm. Təxminən bir neçə dəqiqə sonra həmin şəxs “TikTok”da mənə yazaraq nə üçün “Lotu Quli”ni söydüyümü soruşduqda ona Rövşəni söydüyü üçün etdiyimi dedim. Məni görüşə çağırdı. Getdim. Üzr istəməyimi istədi, mən də etmədim. Bir də gördüm ki, pilləkəni düşən zaman arxadan bıçaqlandım”.
Tərəflərin çıxışından sonra məhkəmə müşavirəyə yollanıb. Sonda məhkəmənin qərarı ilə İ.Həsənov 7 il azadlıqdan məhrum edilib. O, cəzasını ümumi rejimli cəzaçəkmə müəssisəsində çəkəcək.
Fidan İlqar
