Baş Nazir Əli Əsədov məişət zorakılığından zərər çəkmiş şəxslərə dövlət vəsaiti hesabına hüquqi yardımın göstərilməsi qaydasını müəyyən edən yeni Qərar imzalayıb. Qərarın mətni bu gün, 25 iyul tarixində Nazirlər Kabinetinin saytında yerləşdirilib.
Hüquqi yardıma sənədlərin əldə edilməsində köməklik göstərilməsi, zərərçəkmiş şəxsin hüquqlarını və qanuni mənafelərinin müdafiəsi üçün şifahi və ya yazılı hüquqi məsləhətlərin verilməsi, cinayət prosesini həyata keçirən orqanlarda və ya məhkəmələrdə zərərçəkmişləri təmsil etmək, ərizələrin, şikayətlərin və hüquqi sənədlərin tərtib edilməsi daxildir.
Hüquqi yardım göstərmək üçün aşağıdakı sənədlərdən ən azı biri tələb olunur: məişət zorakılığına məruz qalmış şəxsə verilən qısamüddətli və yaxud uzunmüddətli mühafizə orderi, cinayət prosesini həyata keçirən orqanın şəxsin məişət zorakılığı ilə bağlı cinayət işi üzrə zərərçəkmiş şəxs qismində tanınması barədə qərarı, məişət zorakılığı ilə bağlı şikayət üzrə zərərçəkmiş şəxslə bağlı yerli icra hakimiyyəti orqanının qərarı, məişət zorakılığından zərər çəkmiş şəxslərə yardım mərkəzlərinin arayışı, məişət zorakılığı ilə bağlı məlumat bankının məlumatı.
Hüquqi yardımın göstərilməsi üçün ödəniş hüquqi quruma və ya fərdi qaydada işləyən vəkilə bank köçürməsi yolu ilə həyata keçiriləcək.
