Bu gün teatr və kino ustası, Azərbaycan SSR-in Xalq artisti Məlik Dadaşovun anadan olmasının 98-ci ildönümüdür.
O, 1924-cü il iyunun 7-də Bakıda doğulub. 1950-ci ildə Azərbaycan Teatr İnstitutunu (indiki Azərbaycan Dövlət Mədəniyyət və İncəsənət Universiteti) bitirdikdən sonra M.Əzizbəyov adına Akademik Dram Teatrına işə düzəlib.
Əsasən mənfi rolların ifaçısı olan M.Dadaşov yaratdığı obrazların ifası üçün elə gözəl ifadə vasitələri tapırdı ki, hətta tarixi qəhrəmanlar belə reallığa çox yaxınlaşırdı.
"Ölülər"dəki Şeyx Nəsrullah, "Axırıncı aşırım"dakı Qəmlo və s. bütövlükdə kinomuzda yaddaqalan obrazlardandır.
Məlik Dadaşov “Fəryad” filmində erməni obrazını olduqca doğruçu canlandırmışdır. Bunun sayəsində ermənilərə qarşı nifrət hissi daha da artmışdır. Hətta aktyor həyatda da bu obraza görə təqiblərə məruz qalıb. Bir məcburi köçkün onu görər-görməz üzünə möhkəm şillə vurur. Digər məcburi köçkün isə onu görən kimi haray-həşir salıb üzərinə qışqırır. Yaxınlarda olan polis işçisi də Məlik Dadaşovu tanımadığından sənədləri tələb edib.
Ermənilər həmin obraza görə aktyora "Ermənistanın Milli Qəhrəmanı" adını vermək istəyiblər. Məlik isə "Mən düşmənin verdiyi adı daşımaram" deyə etiraz edib.
Aktyor 1996-cı il, 2 dekabr tarixində dünyasını dəyişib.
