Məktəblərdə məntiq fənninin tədris olunması zaman-zaman müzakirə edilir. Kimisi düşünür ki, məktəblərdə bu fənni tədris edə bilmək üçün kadr çatışmazlığı var, kimisi də düşünür ki, fənlərin sayı onsuz da çoxdur. Amma bütün dünyada məntiq hazırda məktəblərdə tədris olunan əsas mövzulardandır. Bəs Azərbaycan təhsili zamanın tələbi ilə necə ayaqlaşacaq?
Bizim.media.аz xəbər verir ki, təhsil eksperti Elşən Qafarov məktəblərdə məntiq fənnini tədris etməyin nə dərəcədə mümkün ola biləcəyindən danışıb:
“Şagirdlərin dərs yükü kifayət qədər çoxdur. Bura məntiqi də əlavə etmək bizə heç nə qazandırmayacaq. Bu gün məktəblərimizdə riyaziyyat, Azərbaycan dili fənləri 5 saat keçirilir. Mən düşünürəm ki, məntiqi bu fənlərin içində vermək daha yaxşı olar. Sovet vaxtı riyaziyyat dərsliklərinin sonunda çətinliyi artırılmış misallar olurdu. Onun hər biri indiki bir məntiq kitabına bərabər idi. Biz aylarla o misalları həll etməyə çalışırdıq. Yenə məntiqi riyaziyyat fənninə əlavə edə bilərik”.
Məntiqin keçirilməsi şagirdlərin ziyanına olacaq?
Elşən Qafarov bildirir ki, şagirdlərin dərs yükü çox olduğu üçün yeni fənnin əlavə olunması sadəcə onların ziyanına olacaq.
“İndiki halda şagirdlərin həftəlik dərs yükünü azaltmaq lazımdır. İbtidai siniflərdə 20 saatdan, 5-9-cu siniflərdə 25 saatdan çox olmamalıdır. Məntiqi bacarıqlar İQ qabiliyyətinə xidmət edir, hər fənn üzrə məntiqi bacarıqları, İQ-nü inkişaf etdirən tapşırıqlar əlavə etmək olar”, – ekspert əlavə edib.
