Ötən gün Xətai rayonunda yerləşən idman klubunda məşq zamanı yeniyetmə idmançılardan biri ehtiyatsızlıqdan digərini boğaraq öldürüb.
Bakuplus.az məsələ ilə bağlı Tibbi Ərazi Bölmələrini İdarəetmə Birliyinə (TƏBİB) sorğu verib.
Qurumdan bildirilib ki, Respublika Təcili və Təxirəsalınmaz Tibbi Yardım Mərkəzinə 13.02.2024-cü il tarixində saat 18:30 radələrində Xətai rayonu ərazisindən çağırış daxil olub:
“Çağırış ünvanına təcili tibbi yardım briqadası cəlb olunub. Təcili tibbi yardım briqadası tərəfindən 14 yaşlı şəxsin (kişi cinsli) həkiməqədər ölüm faktı qeydə alınıb”.
Yeniyetmənin “Hədəf” idman klubunda cüdo məşqi zamanı öldüyü ilə bağlı iddialar var. Məsələ ilə bağlı Bakuplus.az-ın əməkdaşı Azərbaycan Cüdo Federasiyasının (ACF) Marketinq və kommunukasiyalar üzrə meneceri Rəşad Tuncay ilə əlaqə saxlayıb.
R.Tuncay ölüm faktının cüdo məşqi zamanı baş verməsi ilə bağlı iddianı təsdiqləyib: “Hadisə ilə bağlı mənə verilən ilk məlumat yanlış olub. Bir neçə dəqiqə əvvəl klubun məşqçisi Rafael Şahverdiyev ilə əlaqə saxladım. Ölüm hadisəsi cüdo məşqi zamanı baş verib. Amma qeyd edim ki, “Hədəf” idman klubunun Cüdo Federasiyasına aidiyyəti yoxdur. Sadəcə orada region, Bakı və Respublika üzrə birincilərin yarışları keçirilir, onlar arasından milli komandaya idmançı cəlb edirik. Ölüm faktının federasiyaya aidiyyəti yoxdur. Ailəsinə də başsağlığı veririk, səbir diləyirik. Hər bir idmançının başına gələ bilər. Heç kəs istəməz ki, belə bir hal baş versin”.
Hadisə ilə əlaqədar olaraq Bakuplus.az-ın əməkdaşı “Hədəf” idman klubunun cüdo məşqçisi Rafael Şahverdiyev ilə əlaqə saxlayıb.
R.Şahverdiyev danışmaq istəmədiyini qeyd edib.
Nəzrin Vahid
