"Qəza xəbərindən sonra mən və klubumuzun üzvləri çox üzüldük". Bu sözləri Sport24.az saytına açıqlamasında Aktau yaxınlığında AZAL-a məxsus təyyarənin qəzaya uğraması nəticəsində həlak olan 13 yaşlı Məhəmmədəli Eqanovun oynadığı "Gənclik" futbol klubunun baş məşqçisi Vasif Rzayev deyib.
Rzayev bildirib ki, Məhəmmədəlinin ən böyük arzusu peşəkar futbolçu olmaq idi:
"Təəssüf ki, qəzada həlak olanların içərisində futbolçumuz Məhəmmədəli Eqanovun adı var idi. Məhəmmədəli gülərüz və hamının sevimlisi idi. Məşqlərə həvəslə yanaşırdı. Məqsədi futbolçu olmaq idi. Heyif ki, aramızdan tez getdi. Qəzada dünyasını dəyişənlərin ailələrinə səbir diləyirəm".
Xatırladaq ki, dekabrın 25-də Bakı-Qroznı marşrutu üzrə uçan "Embraer 190" sərnişin təyyarəsi Aktaunun hava limanından 3 km məsafədə qəzaya uğrayıb.
