Bu gün metronun "28" May və "Elmlər Akademiyası" stansiyalarında sərnişinlərin giriş qapısından keçməsinə icazə verilməyib.
Metronun qarşısına toplaşan insanların iddiasına görə sərnişinlərdən kimsə qatar xəttinə düşüb.
Məsələ ilə bağlı Bakuplus.az qurumdan açıqlama alıb.
Bildirilib ki, Bakı metrosunda "yaşıl xətt" - "Əhmədli-Dərnəgül" marşrutu üzrə hərəkət edən qatar nasazlıq ehtimalı ilə xətdən çıxarılıb.
"Yaranmış vəziyyətdə sərnişin sıxlığı səbəbindən platformaların ifrat həddə yüklənməsinə yol verməmək məqsədilə zəruri tədbirlər görülür.
Hazırda "28 May" və " Elmlər Akademiyası" stansiyalarında tənzimlənmə və təhlükəsizlik tələblərinin təmin olunması üçün girişlərdə nəzarət-buraxılış tədbirləri gücləndirilib.
Texniki nasazlıq müəyyən edilmiş qatar xətdən çıxarılıb. Əvəzinə xəttə qatar verilib".
***
Bakı metrosunda “yaşıl xətt” - “Əhmədli-Dərnəgül” marşrutu üzrə hərəkət edən qatar “28 may” stansiyasında ikən maşinist nasazlıq ehtimalı ilə qatara sərnişinsiz baxış keçirilməsini tələb edib.
Bu barədə Bakuplus.az-a “Bakı Metropoliteni” QSC-dən bildirilib.
“Bu səbəbdən “28 may” stansiyasında sərnişinlər düşürülüb. Qatar xəttə ikən qatara baxış keçiriləcək. Digər əlavə məlumatları təqdim edəcəyik”, - deyə məlumatda bildirilib.
