Rusiyada məşhurlaşan azərbaycanlı müğənni Nəvai Bəkirov (Navai) bir neçə gün öncə “Kapital Bank”la bağlı şikayət paylaşımı etmişdi.
Sənətçi bankın faizləri ilə bağlı iradını bildirmişdi.
Məsələ ilə bağlı Bakuplus.az-ın əməkdaşı Kapital Banka sorğu ünvanlayıb.
Kapital Bankın İctimaiyyətlə Əlaqələr şöbəsinin rəhbəri Arzu Əliyeva Bakuplus.az-a açıqlamasında bildirib ki, müştərinin Kapital Bank ASC-yə məxsus plastik kartlarla yaşadığı çətinliyin biri xarici ölkədə POS terminalla ödəniş zamanı baş verib:
“Tərəfimizdən müştərinin müraciəti əsasında dərhal araşdırma aparılıb və VİSA şirkətinin verdiyi rəsmi məlumata əsasən məlum olub ki, narahatlıq həmin obyektdə terminalın nasazlığı səbəbindən baş verib.
Müştərinin digər çətinliyi isə kartdan karta pul köçürməsi əməliyyatları ilə bağlı olub. Belə ki, müştəri məhdud istifadə təyinatlı (kənar mədaxil mümkün olmayan) kartına vəsait köçürmək istəyib. Bu zaman kartın təyinatına uyğun olaraq əməliyyat uğursuz olub. Həmçinin müştərinin digər kartla aparmaq istədiyi əməliyyat zamanı yaşanmış çətinlik Kapital Bankla yox, vəsaitin köçürüldüyü qarşı bankla bağlı olub. Belə ki, qarşı banka beynəlxalq sanksiya tətbiq olunduğundan əməliyyatın icrası mümkün olmayıb”.
A.Əliyeva sonda qeyd edib ki, müştəri ilə əlaqə yaradılıb və mövzu ilə bağlı ona ətraflı məlumat verilib.
Nəzrin Vahid
