Bir ildən çoxdur Bakı metropoliteninin “Nizami” stansiyasında platformanın tavanında təmir işləri aparılır. Platformada köhnə tavan örtüyü sökülüb, yenilənir.
Dünyanın ən gözəl metrostansiyaları siyahısına daxil edilən “Nizami” metro stansiyasında aparılan təmir işləri onun yenilənməsinə, daha da gözəlləşməsinə xidmət etsə də, təmir müddətinin uzanması stansiyanın görünüşünə mənfi təsir edir. Bəs təmir nə zaman bitəcək? Bakılılar və şəhərin qonaqları “Nizami” metrostansiyasını nə zaman yenilənmiş formada görəcəklər?
Məsələ ilə bağlı bizim.media-ya açıqlamasında “Bakı Metropoliteni” Qapalı Səhmdar Cəmiyyətinin (QSC) mətbuat xidmətinin rəhbəri Bəxtiyar Məmmədov deyib ki, işlər xüsusi qaydada aparılır: “Təmir işləri gecə saatlarında və qısa müddət ərzində aparılır. Yəni qatarların hərəkəti dayandırılır, gərginlik çıxarılır, elektrik deposundan təsərrüfat qatarı təmir üçün lazım olan avadanlıqla gəlir, bu səbəbdən işlər uzunmüddətlidir. Görülən işlər əsaslı olmalıdır, hər gecənin ən vacib tələbi səhər hərəkət başlayanda sərnişinlərin hərəkət təhlükəsizliyinə mane olan heç bir şeyin orda qalmamasıdır. Bu səbəbdən orda işlər xüsusi qaydada aparılır”.
Qurum rəsmisi işlərin gələn ilin ikinci yarısında yekunlaşacağını bildirib:
“Metroda tələskənliyə yol verib hər hansı işi təcili qurtarmaq prinsipi yox, işin keyfiyyəti və sərnişinlərin hərəkət təhlükəsizliyi gündəmdədir. Orda hər bir işin özünün ağırlıq dərəcəsi, geoloji təsirləri öyrənilərək aparılır. Bundan sonrakı dövrdə münbit şərait olarsa, daha qısa müddətə bitə bilər. “Nizami” metrostansiyası Bakının ən ağır geoloji mühitlərindən biridir. Bu səbəbdən işlər mərhələli aparılır”.
