Bu gün, 9 may tarixində Azərbaycan Respublikasının Prezidenti İlham Əliyev faşizm üzərində tarixi Qələbənin 77-ci ildönümü münasibətilə iki dəfə Sovet İttifaqı Qəhrəmanı, tank qoşunlarının general-mayoru Həzi Aslanovun məzarını ziyarət edib. Bu haqda Bakuplus.az Azərbaycan Respublikası Prezidentinin rəsmi internet saytına istinadən məlumat verir.
Dövlət başçısı Həzi Aslanovun məzarına gül dəstələri qoyub, müharibədə həlak olan bütün Azərbaycan övladlarının xatirəsini ehtiramla yad edib.
Azərbaycan xalqı faşizm üzərində tarixi Qələbənin qazanmasına mühüm töhfə vermişdir. Azərbaycanın 600 min oğlu və qızı cəbhəyə göndərilmişdir. Onlardan 300 mindən çoxu döyüşlərdə qəhrəmancasına həlak olmuşdur. Müharibədə göstərdiyi şücaətə görə Azərbaycanın 130-dan çox nümayəndəsi Sovet İttifaqı Qəhrəmanı adına layiq görülmüş, 170 mindən çox əsgər və zabitlərimiz müxtəlif orden və medallarla təltif edilmişdir.
