Son zamanlar cəmiyyətimizi narahat edən məsələlərdən biri də rus sektoru üzrə təhsil alan uşaqların Azərbaycan dilində danışa bilməməsidir. Bu, ciddi bir problemə çevrilib.
Rus sektoru məktəblərində tədris rus dilində olduğu üçün, uşaqlar gündəlik həyatlarında və təhsil prosesində Azərbaycan dilini istifadə etmirlər. Bu, onların Azərbaycan dilində kommunikasiya bacarıqlarının zəifləməsinə gətirib çıxarır.
Bununla yanaşı rus sektorunda Azərbaycan dilini tədris edən müəllimlərin ana dilini yaxşı bilməməsi ciddi bir problemdir və təhsil sisteminin effektivliyinə mənfi təsir göstərir. Rus sektorunda çalışan müəllimlər bəzən Azərbaycan dili ilə bağlı xüsusi təhsil almamış, yalnız ümumi pedaqoji təhsili olan şəxslər ola bilər. Bu da onların dil bacarıqlarının inkişafını məhdudlaşdırır.
Bəs görəsən, bu tendensiyanın qarşısını almaq üçün nə kimi tədbirlər görülməlidir? Rus sektorunda təhsil alan övladlarımızın Azərbaycan dilini mükəmməl bilməsi üçün nə etmək lazımdır?
Mövzu ilə bağlı Bakuplus.az-a açıqlama verən Milli Məclisin deputatı Ceyhun Məmmədovun sözlərinə görə, rus dilində təhsil almaq ailələrdən asılı məsələdir:
[caption id="attachment_161804" align="alignnone" width="750"]
Ceyhun Məmmədov[/caption]
“Son zamanlar rus dilində təhsilə meyil artıb. Bu məsələ ciddi ölçülüb-biçilməlidir. Rus dilində təhsil alan gənclərin əksəriyyətinin Azərbaycan dilinə danışa bilməməsi fikri ilə razılaşmıram. Bu gün yeni bir nəsil yetişir. Onlar artıq ingilis dilində danışır. O məsələni nəzərə almalıyıq ki, bu gün bizə rus dilində təhsil alan və rus dilini dərindən bilən gənclər də lazımdır. Məktəblərdə rus dilində tədrisi qadağan etmək olmaz. O zaman bu dili bizə kim tədris edəcək? O zaman informasiya mübadiləsini rus dilində necə aparacayıq? Bu məsələyə bir qədər fərqli yanaşmağı bacarmalıyıq”.
C.Məmmədov əlavə edib ki, əgər ailənin övladı rus dilində təhsil alırsa, valideynlər çalışmalıdır ki, evdə övladı Azərbaycan dilində danışsın:
“Ən azı valideyn övladı ilə Azərbaycan dilində danışsın. Bunu da nəzərə almalıyıq. Azərbaycan dilində danışa bilməməsi xoşagələn bir şey deyil. Amma eyni zamanda biz onu da nəzərə almalıyıq ki, rus dili də lazımdır”.
Elm və Təhsil Nazirliyi yanında İctimai Şuranın üzvü, fəlsəfə doktoru İlqar Orucov qeyd edib ki, məktəblərdə uşaqların hansı sektorda təhsil almasından asılı olmayaraq, onlar Azərbaycan dilini, tarixini və ədəbiyyatını mütləq şəkildə öyrənməlidirlər:
[caption id="attachment_161805" align="alignnone" width="640"]
İlqar Orucov[/caption]
“Ola bilsin ki, şagirdlərin əksəriyyəti dərs proqramlarının məzmununu lazımınca mənimsəməyiblər. Bizim şagirdlərimiz Azərbaycan dilini, Azərbaycan tarixini və ədəbiyyatını bilməlidirlər. Məktəbin missiyası gələcək üçün vətəndaş və layiqli şəxsiyyət yetişdirməkdir. Burada məktəblərin üzərinə böyük missiya düşür. Bütövlükdə bu fənlər keyfiyyətli tədris olunmalıdır”.
“Hesab edirəm ki, valideynlər bu məsuliyyəti dərk etməlidirlər. Müəllimlər qeyd olunan fənləri tədris edirlərsə, onunla bağlı bilikləri var. Narazılıq varsa, bu, Elm və Təhsil nazirliyinin səlahiyyətində olan məsələdir. Həqiqətən, narazılıq varsa, nəzərə alınmalıdır. Dərslərin keyifyyəti bərpa olunmalıdır”, - deyə İ.Orucov fikrini tamamlayıb.
Nəzrin Vahid
