Bakıda iyun ayında keçiriləcək Formula 1 üzrə Azərbaycan Qran-prisinə hazırlıq işləri davam etdirilir. Bu səbəbdən şəhərin mərkəzində bəzi yollar qismən bağlı olacaq. Bu haqda 16 may tarixində APA məlumat yayıb.
Tədbir çərçivəsində mayın 16-sı saat 23:00-dan etibarən aparılan quraşdırma işləri ilə əlaqədar olaraq avtomobil yolunun Üzeyir Hacıbəyov prospekti - Puşkin küçəsi və Üzeyir Hacıbəyov küçəsi - Azadlıq prospekti istiqamətində yollar daralacaq.
Bundan əlavə, göstərilən vaxtdan etibarən Neftçilər prospekti ilə Rəsul Rza küçəsinin kəsişməsindən Neftçilər prospekti ilə Əziz Əliyev küçəsinin kəsişməsinə kimi yolun orta hissəsində kiçik qazma işləri aparılır. Qazma işləri on gün davam edəcək. Nəqliyyatın hərəkətində heç bir məhdudiyyət olmayacaq.
Bakı Şəhər Halqası Əməliyyat Şirkəti anlayışa görə sürücülərə təşəkkür edir.
