Binəqədi Rayon Məhkəməsində oğurluqda təqsirləndirilən Ramil Abbasovun cinayət işi üzrə məhkəmə istintaqı yekunlaşıb.
Pravda.az-ın əldə etdiyi məlumata görə, hakim Aytəkin İbrahimovanın sədrliyi ilə keçirilən prosesdə hökm oxunub.
İttihamda göstərilib ki, hadisə 2025-ci ildə Bakı şəhəri, Binəqədi rayonu, 22-ci Dağlıq küçəsində yerləşən taksi şirkətinin ofisində baş verib.
Təqsirləndirilən şəxs həmin vaxt həm işlədiyi, həm də müvəqqəti yaşadığı ofisdə olarkən zərərçəkmiş Əsab Pənahova məxsus xidməti otağa daxil olub. O, saxlanc yeri hesab edilən dolabın siyirtməsinin kilidli olmamasından istifadə edərək orada saxlanılan pul vəsaitini gizli şəkildə götürüb.
Həmin pul vəsaiti ümumilikdə 1 460 manat təşkil edib.
Məhkəmə baxışı zamanı dindirilən Ramil Abbasov özünü təqsirli bilib və ifadəsində törətdiyi əməli etiraf edib.
O, dindirilərkən göstərib ki, həmin dövrdə onlayn kazino oyunlarına aludə olub və böyük məbləğdə pul uduzub. Məhz bu səbəbdən ofisdə saxlanılan pul vəsaitini götürərək qumar oyunlarında istifadə edib. Fikirləşib ki, oyunda udar və həm əvvəlki zərəri aradan qaldırar, həm də götürdüyü pulları geri qaytarar. Amma uduzduğu vəsaiti geri qazana bilməyib.
Məhkəmənin hökmü ilə ona 1 il 11 ay 26 gün müddətə azadlığın məhdudlaşdırılması cəzası təyin edilib.
Qeyd edək ki, ad və soyadlar şərti verilib.
