Abşeronda tanışını yumruqla vuraraq öldürüb, sonra meyiti basdırmaqda ittiham olunan Sərxan Əliyevin məhkəmə prosesi yekunlaşıb.
Apa.az xəbər verir ki, Bakı Hərbi Məhkəməsində hakim Zeynal Ağayevin sədrliyi ilə keçirilən prosesdə hökm oxunub. Hökmə əsasən, Sərxan Əliyev 17 il müddətinə azadlıqdan məhrum edilib.
Qeyd edək ki, hadisə bu il aprelin 27-də Abşeron rayonu ərazisində baş verib. 2002-ci il təvəllüdlü Sərxan Əliyev Abşeron rayonunun Məmmədli kəndi ərazisində yerləşən fərdi yaşayış evlərində birində tanışı Zaur Seyfullayevlə spirtli içki qəbul edib. Sonra aralarında yaranmış mübahisə zamanı Sərxan Zaura yumruqla zərbə vurub. Zaur yıxılaraq aldığı xəsarətdən ölüb.
Sərxan Əliyev polis əməkdaşları tərəfindən saxlanılaraq istintaqa təhvil verilib və prokurorluğun qərarı əsasında şübhəli şəxs qismində tutulub.
Həmçinin Sərxan Əliyevin ilkin ifadəsi əsasında Zaur Seyfullayevin meyitinin basdırıldığı yer müəyyən olunaraq prokuror-kriminalist və ekspertin iştirakı ilə çıxarılıb.
