Xuliqanlıq niyyəti ilə qəsdən sağlamlığa az ağır zərər vurmada təqsirləndirilən Samir Əsədovun (şərti) cinayət işi üzrə məhkəmə istintaqı yekunlaşıb.
Pravda.az-ın əldə etdiyi məlumata görə, Abşeron Rayon Məhkəməsində hakim Vaqif Həsənovun sədrliyi ilə keçirilən prosesdə hökm oxunub.
Məhkəmənin hökmü ilə ona 2 il müddətinə azadlığın məhdudlaşdırılması (elektron qolbaq) cəzası təyin edilib.
İttihama görə, hadisə 19 aprel 2023-cü il tarixdə, saat 08 radələrində Abşeron rayonu, Masazır qəsəbəsində baş verib.
Samir Əsədov anası, zərərçəkmiş Nisə Əsədovanın (şərti) yaşadığı evə gəlib. O, həmin evin yerləşdiyi torpaq sahəsinin ona məxsus olmasını deyib, mərhum qardaşının arvadı ilə mübahisə edib. Bu zaman anası Samirə irad bildirib və onu evdən qovmağa çalışıb. Təqsirləndirilən şəxs isə bunu bəhanə edərək Nisə Əsədovanın biləklərindən tutub, qəsdən itələyib və yerə yıxıb. Nəticədə qadının 1-ci bel fəqərəsinin yerdəyişməyən sınığı xəsarəti yetirməklə sağlamlığın uzun müddətə pozulmasına səbəb olan qəsdən sağlamlığına az ağır zərər vurub.
Hadisədən sonra Samir Əsədov saxlanılaraq cinayət məsuliyyətinə cəlb edilib.
