Son dövrlər Azərbaycanda uşaq ölümlərinin sayı ictimaiyyətdə narahatlığa səbəb olub.
Rəsmi məlumatlara görə, ötən il ölkədə 2039 bir yaşadək körpə ölümü baş verib və bunun 1317-si şəhər, 722-si isə kənd yerlərində qeydə alınıb. Beş yaşadək ölən uşaqların sayı 2 min 395 olub ki, bunun da 1329-u oğlan, 1066-sı qızdır.
Həmçinin 531 körpə ölü doğulub. Keçən il perinatal dövrdə (dölün bətndaxili həyatının 22-ci tam həftəsindən başlayır) ölənlərin sayı 1 837 döl təşkil edib. Bundan başqa, həmin müddətdə 7 günədək ömür sürən körpə sayı 1 306-dır.
2025-ci ilin ilk 10 günlüyünü yaşayırıq. Lakin artıq bir neçə uşaq ölümü faktı var.
Bəs görəsən, ümumiyyətlə uşaq ölümlərinin səbəbləri nədir? Hansı xəstəliklərə daha çox rast gəlinir?
Mövzu ilə bağlı Bakuplus.az-a açıqlama verən həkim-pediatr Günay Rəsulovanın sözlərinə görə, ən çox ölümlər perinatal dövrdə qeydə alınır:
[caption id="attachment_167329" align="alignnone" width="640"]
Günay Rəsulova[/caption]
“Uşaq ölümlərinin bir sıra səbəbləri ola bilər. Ən çox ölümlər perinatal dövrdə qeydə alınır. İnkişaf qüsurları, genetik ağır xəstəliklər və sindromlarla doğulan uşaqlar da bu hallarda olur.
Bəzən erkən bətndaxili keçirilən infeksiyalar nəticəsində ağır ürək xəstəliyi və inkişaf qüsurları ilə doğuş baş verir. İlk bir ayda olan ölüm halları sırf bu uşaqların payına düşür”.
G.Rəsulova qeyd edib ki, hamiləlikdə erkən diaqnostika çox önəmlidir:
“Hamiləlikdə müayinələr şərtdir. Erkən diaqnostikada inkişaf qüsurları zamanında aşkarlanır. Bu, doğumdan sonrakı dövrdə ölüm hallarının azalmasına səbəb ola bilir. Uşaq ölümlərinin ən əsas səbəbi infeksiyalardır. Peyvəndsiz uşaqlar ağır infeksiyalara yoluxurlar. Bu infeksiyaların müalicəsi yoxdur. Ancaq uşağın immuniteti bu infeksiyaların öhdəsindən gələrsə, uşaq sağ qalır, gəlməzsə, uşaq tələf olur.
Bəzi travmalar da uşaq ölümlərinin səbəbləri arasında yer alır, məsələn, yanıqlar. Ona görə də ailələr çox diqqətli və ehtiyatlı olmalıdırlar”.
Nəzrin Vahid
